زبانحال یتیمان کوفه- شاعر منزووی اردبیلی

آنا غذارسان شب  شفق قرالدی گلمدی

او هرگجه گلن عرب شفق قرالدی گلمدی

کیمیدی هرگجه گلوب بیزه ویرردی نان شب

ئوزی ییردی دوز چورک ویرردی بیزلره رطب

گولینجه دیندیرردی هی منی او مرد باادب

ویرردی قلبیمه طرب شفق قرالدی گلمدی

گورنده غصه لنمیشم سیزیلدورام حزین حزین

آلوب قوجاقه لطفلن چکردی باشیمه الین

هزار حیف آدین ولی سوروشمادیق او سرورین

گورک کیمیدی اول عرب شفق قرالدی گلمدی

بیله گلور خیالیمه چوخ ایشلری نهانیدی

بو کوفه ده یتیم لره یگانه پاسپانیدی

یتیملره آتا کیمین اوقدری مهربانیدی

هزار حیف او منتخب شفق قرالدی گلمدی

مثال کیسه دولدوروب گورردیم ئوز عباسینی

قاپی قاپی ویروب گیدور یتیملرون غذاسینی

دوتوب ئوپردی بیر به بیر شهیدلرون بالاسینی

ویرردی نانیلن رطب شفق قرالدی گلمدی

دوباره گلسه ایومیزه اگر او مرد محترم

دوشوب یره قدملرون ئوپوب زیارت ایلرم

گجه لر آج یاتاق گرک کم اولسا حرمت ایلرم

دوشوبدی جانه تاب وتب شفق قرالدی گلمدی

اونون گوزل شمایلین خیالیدن آتانمارام

باشیما سایه سالماسا مرامیمه چاتانمارام

اوقدری نازیمی چکوب من ایندی آج یاتانمارام

چراغدا یاندی ای عجب شفق قرالدی گلمدی